【Quote of the Day】#真男人字典裡無不可能 #MrBusiness
「一些人一生都在說無可能！」— 王維基
股市同實體經濟脫鈎，科技股表現一枝獨秀，投資香港股票市場，揸住ATMX任何一隻，過去半年瞓緊覺都笑醒。好在，仲有一隻made in Hong Kong做到代表，逆市上揚戰績彪炳，我講緊就係王維基創辦嘅香港電視，數數手指，市值已經等於2間昔日「競爭對手」無線電視。
做生意叻有幾種人，第一種係跟市場跟得好貼，睇到市場環境開始有需求，就立即企喺風口位，連肥豬都會飛天；第二種係認為市場有發展潛力，透過教育市場製造需求。前者講眼光，後者講眼光加膽識，王維基就屬於後者。由大搞IDD電話服務，到開辦電視台，再到搞網購超市平台，人哋眼中每一樣不可能嘅任務，都成為王維基推進自己嘅動力，或者每個成功企業家都會有呢種「反叛精神」。
喺呢半年聽到好多「轉型」故事，食肆要轉型、零售要轉型、教書都要轉型。轉型好多時都係心不甘情不願由環境逼成，試諗下要壯士斷臂，將辛苦建立嘅經驗拋棄，係個非常痛苦嘅決定。不過事後孔明一點睇，好似王維基嘅故事，當日搞唔成電視台，逼住轉型然後搞網購生意，或者行咗一條更岩、更成功嘅道路。咁算唔算係塞翁失馬，焉知非福？所以被逼轉型，可能會令你當下迷失，但都會係將你帶到更高更遠嘅好機會。
無論做生意定打工，祝大家逆境中轉型成功，事業轉虧為盈！
Search